Унгарын Их Дуулгаас Ө.Бямбасүрэн мөнгө, Б.Баасанхүү хүрэл медаль хүртэв
<p>Энэ сарын 11-нээс 13-ныг дуустал жүдогийн Унгарын Их Дуулга тэмцээн боллоо. Нийт 67 орны 504 жүдоч өрсөлдсөн тус тэмцээнд Монголоос есөн тамирчин өрсөлдөв. </p> <p>Манай жүдочдоос эрэгтэйчүүдийн 66 кг-ын жинд Ө.Бямбасүрэн мөнгө, эмэгтэйчүүдийн 48 кг-ын жинд Б.Баасанхүү хүрэл медаль хүртсэн байна. Нийт 29 улс ямар нэгэн медаль хүртсэнээс Монголын баг 14 дүгээр байранд жагсав.</p> <p>Японы баг гурван алт, нэг мөнгө, гурван хүрэл медаль хүртсэнээр медалийн чансаагаар тэргүүлсэн бол ОХУ хоёр алт, хоёр мөнгө, нэг хүрэл, Израиль хоёр алт, нэг хүрэл медалиар удаалжээ. </p> <p>Түүнчлэн Бразил, Азербайжан, Итали, Испани, Хорват, Болгар, Грек тус бүр нэг алтан медаль зүүв.</p> <div class="ikonmedia margin-bottom16" contenteditable="false" da="zoom"><img class="thumb" src="https://content.ikon.mn/news/2026/9/14/d1nb8i_EDF_1779-1789134163-1789134163_ph.jpg" /> <img alt="зураг" class="ikonlazy" data-action="zoom" data-src="https://content.ikon.mn/news/2026/9/14/d1nb8i_EDF_1779-1789134163-1789134163_x974.jpg" /> <div class="ikonarsave" style="font-size: 0;line-height: 0;padding-bottom: 66.66666666666666%;"> </div> </div> <p class="phalf">Өдгөө 23 настай Ө.Бямбасүрэнгийн хувьд Их Дуулга тэмцээнээс анхны медалиа хүртсэн юм. Ингэснээр тэр дэлхийн чансаандаа 700 оноо нэмэрлэж, нийт 705 оноогоор 446 байр ахиснаар 69-д бичигдэж эхэллээ. </p> <p class="phalf">Тэгвэл олимпоос хойш хэсэг хугацаанд завсарлаад эргэн ирсэн Хөдөлмөрийн баатар, гавьяат тамирчин Б.Баасанхүү олон улсын хоёр дахь тэмцээндээ оролцоод хүрэл медаль зүүлээ. Ийнхүү Б.Баасанхүү дэлхийн чансаанд 660 оноогоор 53-т жагсах болсноор ирэх аравдугаар сард болох жүдогийн Дэлхийн Аварга Шалгаруулах Тэмцээн (ДАШТ)-д оролцох боломжтой болж байна.</p> <p class="phalf">Олон Улсын Жүдогийн Холбоо (IJF)-ны дүрмийн дагуу дэлхийн чансааны эхний 100-д багтсан тамирчин ДАШТ-д улсаа төлөөлөн оролцох боломжтой юм.</p>