Ирэх онд нийслэлээс 20,000-25,000 ажлын байр шинээр бий болгохоор төлөвлөжээ
<p>Нийслэлийн Иргэдийн Төлөөлөгчийн Хурал(НИТХ)-ын ээлжит бус XIV хуралдаан болж байна. Уг хуралдаанаар Нийслэлийн хөгжлийн 2027 оны төлөвлөгөө батлах тухай танилцуулсан юм.</p> <p>Энэ үеэр <strong>НИТХ-ын гишүүн Т.Батцогт </strong>ирэх онд нийслэлээс хэдэн ажлын байр бий болгох талаар тодруулав. Түүний асуултад НЗДТГ-ын Нийслэлийн Үйлчилгээний нэгдсэн төвийн дарга <strong>Б.Ууганбат </strong>"2025 оны дүнгээр Улаанбаатар хотын хэмжээнд 627,516 ажил эрхэлж байгаа бүртгэлтэй иргэд байгаа гэсэн мэдээлэл бий. Ажил эрхлээгүй 38,620 буюу ажилгүйдлийн түвшин 5.6 хувьтай байна.</p> <p>Өнгөрсөн онд 6,024 ажлын байр шинээр нэмэгдсэн бол энэ оны эхний есөн сарын байдлаар 2,916 ажлын байр нэмэгдсэн үзүүлэлттэй байгаа.</p> <p>Ажил, мэргэжлийн баримжаа олгох үйл ажиллагаанд 17,399 иргэн хамрагдсан. Хөдөлмөрт бэлтгэх сургалтад 5,915 иргэн хамрагджээ.</p> <p>Өнгөрсөн оны байдлаар хөгжлийн бэрхшээлтэй 501 иргэн ажилд орсон бол түр ажлын байраар 632 хүн хангагдсан гэсэн үзүүлэлттэй байна.</p> <p>Ирэх онд үндсэндээ дагуул хотууд болон технологийн паркуудын үйл ажиллагаатай уялдуулаад 20,000-25,000 иргэнийг ажлын байраар хангах төлөвлөгөөтэй байгаа. Хөдөлмөрт зуучлах ажлыг есөн дүүрэгт тогтмол хэрэгжүүлж байна" гэв.<strong> </strong></p>