"Хотын дарга сонсож байна 150150 дугаарт зам, инженерийн шугам болон газар, барилгатай холбоотой хүсэлт хамгийн их ирсэн"
<p>Иргэдийн санал, хүсэлтийг хүлээн авах "Хотын дарга сонсож байна" тусгай дугаарыг наймдугаар сарын 14-ний өдрөөс ажиллуулж эхэлсэн.</p> <p>Өнөөдрийн байдлаар 150150 тусгай дугаарт нэг сарын хугацаанд иргэдээс нийт 5,479 хүсэлт бүртгэгдэж, 427 албан хаагч шийдвэрлэж, 3,517 иргэнд хариу хүргэж, хүсэлтийг хаажээ. Иргэдийн хүсэлтийн шийдвэрлэлт 64.2 хувьтай байгааг <strong>НЗДТГ-ын хэвлэл мэдээлэл, олон нийттэй харилцах хэлтсээс</strong> мэдээллээ.</p> <p>Иргэд 150150 тусгай дугаарт зам, тээвэр, инженерийн шугам, газар, барилгатай холбоотой асуудлаар хамгийн их буюу 61.7 хувь нь ханджээ.</p> <p>Иргэд 150150 тусгай дугаарт мессеж үнэгүй илгээн санал, хүсэлтээ илэрхийлэхээс гадна mayor@ulaanbaatar.mn и-мэйл хаягаар холбогдох боломжтой байна.</p> <p> </p>