ОХУ-ын Эрхүү муж гадаадын иргэдийг цэрэгт зуучилж, элсүүлсэн хүмүүст олгох шагналын хэмжээгээ $18,000-д хүргэв
<p>Эрхүү мужийн захиргаа гадаадын иргэд болон харьяалалгүй иргэдийг Оросын цэргийн албанд амжилттай элсүүлж чадсан хүмүүст олгох шагнал урамшууллын хэмжээг ОХУ-ын хэмжээнд хамгийн өндөр түвшинд хүргэх <a href="http://publication.pravo.gov.ru/document/3800202609110003?index=2" target="_blank">шийдвэрийг Пүрэв гарагт</a> гаргажээ.</p> <p>Уг шийдвэрийн дагуу зуучлагч нь цэргийн гэрээт албанд элсүүлсэн гадаадын иргэн бүрийн тоогоор 1.5 сая рубль ($17,800 орчим) авахаар болсон байна.</p> <p>Энэ нь сүүлийн долоон сарын хугацаанд дөрөв дахин нэмэгдэж, Оросын бусад бүх бүс нутгуудын амласан шагналаас давсан хэмжээ болохыг Вёрстка суваг мэдээлжээ.</p> <p>Эрхүү муж өмнө нь иргэний харьяаллаас үл хамааран байгуулагдсан гэрээ бүрийн тоогоор 400,000 рублийн ($4,700) шагналыг зуучлагчдад олгодог байсан юм. Харин сүүлийн шийдвэрээр гадаадын болон харьяалалгүй иргэдийн урамшууллыг онцгойлон дөрөв дахин өсгөж, Оросын бусад бүс нутгуудаас элсүүлсэн цэрэг бүрийн үнэлгээг 800,000 рубль ($9,500) болгон хоёр дахин өсгөжээ.</p> <p>Эрхүүгийн энэ шийдвэр Оросын бүс нутгуудын удирдлага дээрээс өгсөн цэрэг элсүүлэх квотоо гүйцээхийн тулд эрчимтэй ажиллаж байгааг харуулсан нэг жишээ болж байна.</p> <p>Саяхан Смоленск муж зуучлагчийн шагналыг 115,000 рублиэс ($1,300) нэг сая рубль ($11,900) болгон огцом өсгөсөн бол Рязань муж 805,000 рубль ($9,500) болгон өсгөжээ.</p> <p>Украины эрх баригчид өмнө нь 2026 оны дөрөвдүгээр сарын байдлаар Умард Солонгосыг оролцуулалгүйгээр Оросын талд дэлхийн 136 улсын 28,000 гаруй иргэн тулалдаж байгааг мэдээлж байв.</p> <p>Пүрэв гарагт нийтлэгдсэн Эмнести Интернэйшнл байгууллагын тайланд иргэдийг цэрэгт элсүүлэх Оросын хүчин чармайлт нь улам бүр “хууран мэхлэлт, албадлага, мөлжлөгийн арга хэлбэртэй” болж байгаа талаар дурдсан байна.</p> <p> </p> <p>Эх сурвалж: <strong>The Moscow Times</strong></p> <p> </p>