Япон улс НҮБ-ын баталсан шинэ газрын зураг дээр Курилийн арлууд Оросын харьяанд дүрслэгдсэнийг засахыг шаарджээ
<p>Өнгөрсөн долоо хоногийн Баасан гарагт НҮБ-ын ерөнхий ассамблей дэлхийн газрын зургийн засаж сайжруулсан шинэ хувилбарыг албан ёсны болгох тогтоол баталсан.</p> <p>16 дугаар зуунд бүтээгдсэн Меркаторын газрын зурагт Умард туйлд ойрхон тивүүдийг бодит байдлаас томруулж үзүүлсэн байдаг нь гурван хэмжээст бөмбөрцгийг хоёр хэмжээст хавтгайд буулгахад гарсан гажуудал юм.</p> <p>Харин “Equal Earth” нэртэй шинэ газрын зурагт энэ гажуудлыг зассанаар өмнө нь том харагддаг байсан тивүүд бодит хэмжээндээ хүрч, экваторын ойролцоох тивүүд илүү том харагддаг болсон.</p> <p>Тэгвэл Япон улс уг шинэ газрын зураг дээр маргаантай Курилийн арлуудыг Оросын газар нутгийн нэг хэсэг мэт харуулсныг засах шаардлагыг зураг бүтээгчдэд тавьжээ.</p> <p>Шинэ газрын зургийг батлахыг дэмжсэн дэлхийн 164 улсын нэг Япон байсан юм. Гэвч Японы засгийн газрын “Умард нутаг” гэж нэрлэдэг өмнөд Курилийн дөрвөн арлыг ОХУ-ын нутаг дэвсгэртэй ижил өнгөөр дүрсэлсэн нь асуудал үүсгэсэн байна.</p> <p>Өнгөрсөн долоо хоногт болсон НҮБ-ын санал хураалтад Украин улс оролцохоос түдгэлзсэн нь Крымийн хойгийг тус улсын бусад газар нутгаас өөр өнгөтэй дүрсэлсэнтэй холбоотой байсан юм.</p> <p>НҮБ-д суугаа Украины төлөөлөгч үүнийг олон улсын эрх зүйг зөрчсөн, “Пандорагийн хайрцгийг нээх” үр дагавартай үйлдэл хэмээн анхааруулж байв.</p> <p>Японы засгийн газрын хэвлэлийн төлөөлөгч Минорү Кихара өчигдөр мэдэгдэлдээ “Equal Earth” хэмээх газрын зургийн төсөл “Японы засгийн газрын байр суурьтай зөрчилдөхүйц дүрслэл агуулсан” гэж тайлбарлажээ.</p> <p>“Бид уг газрын зургийг бүтээсэн байгууллагад дипломат шугамаар эсэргүүцэл илэрхийлж, уг дүрслэлийг засахыг шаардсан” гэж Кихара сэтгүүлчдэд хэлсэн байна.</p> <p>Тэрбээр уг асуудал хэзээ засгийн газрынх нь анхааралд орсныг хэлээгүй ч Япон улс “өөрийн нутаг дэвсгэр болон газар зүйн нэршлийн талаарх буруу ойлголт тархахаас сэргийлэх үүрэгтэй” гэж мэдэгджээ.</p> <p>Дээр дурдсан дөрвөн арлыг 1945 онд Зөвлөлт Холбоот Улсын арми эзэлж, тухайн үед амьдарч байсан япон иргэдийг албадан гаргасан гэдэг.</p> <p>Өнгөрсөн сард ОХУ-ын ерөнхийлөгч Владимир Путин эдгээр арлуудын нэгд анх удаа зочлоход Япон улс Токио дахь элчин сайдыг нь дуудан эсэргүүцэл илэрхийлж байлаа.</p> <p>Ерөнхий сайд Санае Такаичи уг айлчлалыг “Японы ард түмний зүрх сэтгэлийг шархлуулсан”, “огт хүлээн зөвшөөрөх боломжгүй” үйлдэл хэмээн мэдэгдэж байв.</p> <p>Тэрбээр эдгээр арлууд нь “түүхийн болон олон улсын эрх зүй үүднээс Японы нутаг дэвсгэрийн салшгүй хэсэг” болохыг онцолж байжээ.</p> <p> </p> <p>Эх сурвалж: <strong>AFP</strong></p> <p> </p>