Швейцар улс “Үхлийн сахиусан тэнгэр” гэгддэг Нацист Германы эмчийн тухай 200 хуудас бичиг баримтыг ил болгожээ
<p>Швейцарын Холбооны тагнуулын алба Пүрэв гарагт Нацист Германы эмч, дайны гэмт хэрэгтэн Йозеф Менгелетэй холбоотой 200 хуудас бичиг баримтыг олон нийтэд ил болгожээ.</p> <p>Тэрбээр Аусшвицийн хорих газарт хоригдлууд дээр эмнэлгийн аймшигт туршилт явуулдаг байсныхаа төлөө “Үхлийн сахиусан тэнгэр” хэмээн алдаршсан эмч байсан юм.</p> <p>Дэлхийн хоёрдугаар дайны үеэр түүний ажиллаж байсан Польшийн нутагт оршдог Аусшвицийн хорих газарт нийт 1.1 сая орчим хүн амь үрэгдсэний нэг сая орчим нь жүүд хүмүүс байжээ.</p> <p>Менгеле шинжлэх ухааны судалгаа нэрийн дор хоригдлууд, тэр дундаа хүүхдүүд дээр харгис хэрцгий эмнэлгийн туршилтууд явуулж байсан гэдэг.</p> <p>Дайны дараа тэр хуурамч нэр ашиглан Улаан Загалмайн нийгэмлэгийн бичиг баримтаар Европоос зугтсан юм.</p> <p>Латин Америкт олон жил нуугдаж амьдарсан тэрбээр 1979 онд Бразилын эрэг орчимд сэлж байхдаа усанд живж нас баржээ.</p> <p>Өчигдөр нийтлэгдсэн бичиг баримтад Менгеле дүрвэснийхээ дараа хуурамч нэр ашиглан Швейцарт ирсэн байж болзошгүй, эсвэл ирэхээр төлөвлөж байсан тухай тагнуулын мэдээлэл багтсан байна.</p> <p>Эрэн сурвалжлагдаж байх хугацаандаа тэр Швейцарт хэсэг хугацаанд байсан эсэхийг түүхчид батлахын тулд архивын нууц бичиг баримттай танилцах боломжийг олон жилийн турш эрэлхийлж байсан юм.</p> <p>Швейцарын эрх баригчид нэр нь дурдагдсан хувь хүмүүсийн аюулгүй байдлыг хангах үүднээс дээрх бичиг баримтуудыг 2071 он хүртэл нууцлах ёстой гэж үзэж байв.</p> <p>Гэвч түүхч Жерард Уэтстейн уг хоригийг цуцлуулахаар Холбооны Захиргааны шүүхэд хандсан нь амжилтад хүрснээр ийнхүү ил болгож байгаа юм.</p> <p>Ил болгосон бичиг баримтуудад зарим гуравдагч хүмүүсийн хувийн нууцыг хамгаалах зорилгоор нэр усыг нь дарсан байна.</p> <p> </p> <p>Эх сурвалж: <strong>Associated Press</strong></p> <p> </p>