Өмнөд Солонгосын түүхэнд хамгийн өндөр зардалтай гэр бүл салалт $1.8 тэрбумаар үнэлэгдэв
<p>Өмнөд Солонгосын шүүх өчигдөр компьютер тоглоомын тэрбумтан Квон Хюк Бинээр салсан эхнэрт нь 2.55 их наяд вон ($1.87 тэрбум) төлүүлэх шийдвэр гаргасан нь тус улсын түүхэнд хамгийн өндөр зардалтай гэр бүл салалт болжээ.</p> <p>Өмнөд Солонгосын гурав дахь том тоглоом хөгжүүлэгч Smilegate компанийг үүсгэн байгуулсан Квон бол тус улсын хамгийн баян хүмүүсийн нэг бөгөөд Блүүмбэрг агентлаг хөрөнгийн хэмжээг нь $3 тэрбум орчим гэж тооцоолсон байдаг.</p> <p>Тэрбээр компаниа 100 хувь эзэмшдэг юм. Лхагва гарагт гарсан шүүхийн шийдвэрээр Квон компанийнхаа эзэмшлийн 35 хувь буюу ойролцоогоор 2.5 их наяд вонтой тэнцэх үнэлгээтэй хувьцааг экс эхнэр И Хва Жинд шилжүүлэхээр болжээ.</p> <p>Үүнээс гадна Квон 65 тэрбум воныг бэлнээр төлөх ёстой болсон байна.</p> <p>Өмнөд Солонгосын түүхэн дэх хамгийн өндөр зардалтай гэр бүл салалт өмнө нь SK группийн ерөнхийлөгч Чэй Тэ Воны хуучин эхнэртээ төлөх 944 тэрбум вон тооцогддог байсан юм.</p> <p>Тэгвэл Квоны хуваах хөрөнгийн хэмжээ Чэй Тэ Воныхоос хоёр дахин өндөр болж байна.</p> <p>Эхнэр нь Квоноос салахдаа Smilegate компанийн хувьцааны 50 хувийг авах хүсэлт гаргаж байжээ. Тэрбээр компанийг анх байгуулагдахад санхүүгийн хувь нэмэр оруулсан үндэслэлээр ийм хүсэлт гаргасан байна.</p> <p>Квон, И нар 2001 онд гэрлэж, жилийн дараа Smilegate байгуулагдаж байжээ.</p> <p>Тус компанийн хөгжүүлсэн CrossFire, Lost Ark зэрэгт тоглоомууд зах зээлд хамгийн алдартай байдаг.</p> <p>И Хва Жин бас 20 гаруй жил хүүхдүүдээ өсгөж, гэр орноо авч явсан өөрийн хүчин зүтгэлээ үнэлсэн юм.</p> <p>Харин Квон түүнийг хөрөнгө оруулаагүй, компанид ажиллаж байгаагүй гэж маргаж байжээ.</p> <p>Энэ оны эхээр Smilegate компаниас гаргасан мэдэгдэлд тус компанийн эхний хөрөнгө оруулалт бүхэлдээ Квоноос гарсныг баталж байлаа.</p> <p>Квон, И нарын хэн хэн нь өчигдрийн шүүхийн шийдвэрийг давж заалдах боломжтой байна.</p> <p> </p> <p>Эх сурвалж: <strong>BBC</strong></p> <p> </p>