“Сибирийн Хүч 2” байгалийн хий дамжуулах хоолойн төсөл үнэ тарифын маргааны улмаас гацсаныг эх сурвалжууд мэдээлжээ
<p>Үнэ тарифын санал зөрөлдөөний улмаас Оросоос Монголоор дайруулан Хятад руу байгалийн хий дамжуулах “Сибирийн Хүч 2” хоолойн төсөл зогссоныг хэд хэдэн эх сурвалж мэдээлжээ.</p> <p>Талуудын үнэ тарифын талаарх хүлээлт нэлээд том зөрүүтэй байгаа бөгөөд үүнийг арилгах боломж одоогоор харагдахгүй байгаа гэнэ.</p> <p>“Хятадын тал хийг Оросын дотоодын айл өрхүүдийн тариф буюу мянган шоо метр тутамд $50, эсвэл дотоодын үйлдвэрүүдийн тариф буюу мянган шоо метр тутамд $120-$130 үнээр авах хүсэлтэй байгаа” гэж нэрээ нууцалсан албаны нэг эх сурвалж мэдээлжээ.</p> <p>Харин Оросын хувьд “Сибирийн Хүч 1” хоолойн тарифаар буюу мянган шоо метр тутамд $250-$260 үнээр нийлүүлэх сонирхолтой байгаа гэнэ.</p> <p>Украины дайнаас өмнө Европын зах зээлд Орос улс байгалийн хийгээ мянган шоо метр тутамд $420 үнээр нийлүүлдэг байжээ.</p> <p>“Газпром болон CNPC (China National Petroleum Corporation) компаниуд одоо Алс Дорнодын хоолойгоор Оросын байгалийн хийг Хятадын зах зээлд нийлүүлэх, энэ замын багтаамжийг өргөжүүлэх талаар хэлэлцэж байгаа. Сибирийн Хүч 1 хоолойд ч бас адил өргөжүүлэх ажил хийгдэж байна” гэж нэрээ нууцалсан хоёр дахь эх сурвалж мэдээлсэн байна.</p> <p>Өөрөөр хэлбэл талууд шинэ “Сибирийн Хүч 2” төслийг орхиж, одоо ажиллаж байгаа хоёр чиглэлийн хоолойгоор нийлүүлэлтээ нэмэгдүүлэхээр ажиллаж байгаа бололтой.</p> <p>“Сибирийн Хүч 2” төслийн 2,600 км урт хоолой нь Умард туйлын Ямалын хойг дахь ордоос Монголоор дайруулан Хятад руу жилд 50 тэрбум шоо метр хий дамжуулах зорилготой юм.</p> <p>Уг төслийн санамж бичигт Орос, Хятадын талууд 2006 онд гарын үсэг зурж байжээ.</p> <p>Энэ сард Владивосток хотод зохион байгуулагдсан Дорнын Эдийн Засгийн Чуулганы үеэр ОХУ-ын эрчим хүчний сайд Сергей Цивилев уг хоолойн нэрийг ерөнхийлөгч Путин “Байгалын Хүч” болгон өөрчилснийг мэдээлсэн ч учир шалтгааныг нь тайлбарлаагүй юм.</p> <p>Хятадын ерөнхийлөгч Ши Жиньпин, Оросын ерөнхийлөгч Владимир Путин нар наймдугаар сарын 31-нээс есдүгээр сарын нэгний хооронд Киргизстаны нийслэл Бишкек хотод зохион байгуулагдсан Шанхайн Хамтын Ажиллагааны Байгууллагын дээд хэмжээний чуулганы үеэр “Сибирийн Хүч 2” төслийн талаар ярилцах төлөвтэй байсан. Гэвч албан ёсны мэдэгдэлд энэ талаар дурдаагүй өнгөрсөн байна.</p> <p> </p> <p>Эх сурвалж: <strong>South China Morning Post</strong></p> <p> </p>