Тетрис компанийн анхааруулгын дараа Цагаан ордон “Build the Wall” тоглоомыг вэб сайтаасаа буулгажээ
<p>Өнгөрсөн долоо хоногт АНУ-ын ерөнхийлөгчийн Цагаан ордон вэб сайтдаа Трампын мөрийн хөтөлбөрийг сурталчилсан улс төрийн агуулгатай хуучны видео тоглоомууд бүхий хуудас нээсэн юм.</p> <p>Тэдний нэг болох “Build the Wall” нэртэй тоглоом нь дэлхий дахинд алдартай Тетрис тоглоомыг дуурайлгасан хийцтэй байжээ.</p> <p>Тэгвэл Цагаан ордон “Хилээ хууль бус нэвтрэгчдээс хамгаалъя” уриатай, хана өрдөг энэ тоглоомыг өчигдөр вэб сайтаасаа буулгасан байна.</p> <p>Яагаад ийм арга хэмжээ авах болсноо Цагаан ордон тайлбарлаагүй юм.</p> <p>Гэхдээ дөрөв хоногийн өмнө Тетрис компани уг тоглоомыг бүтээхэд оролцоогүйгээ мэдэгдээд зохиогчийн эрхийг хүндлэхийг Цагаан ордонд анхааруулж байжээ.</p> <p>“Тетрис компани Build the Wall тоглоомыг бүтээхэд оролцоогүй бөгөөд уг тоглоомд оюуны өмчийн зөвшөөрөл олгоогүй болно” гэж тус компани мэдэгдэж байв.</p> <p>Хууль эрх зүйн арга хэмжээ авах эсэхийг нь асуухад Тетрис “одоохондоо энэ асуудлыг судалж байна” гэж хариулжээ.</p> <p>“Тетрис компани хүмүүсийг хуваах биш нэгтгэх нь илүү хүчтэй гэдэгт итгэдэг. Ташрамд дурдахад бид оюуны өмчийн зөрчлийг маш нухацтай авч үздэг” гэж тэд мэдэгдсэн байна.</p> <div class="ikonmedia margin-bottom16" contenteditable="false" da="zoom"><img class="thumb" src="https://content.ikon.mn/news/2026/9/9/zzzgfm_white_house_arcade_0_ph.jpg" /> <img alt="зураг" class="ikonlazy" data-action="zoom" data-src="https://content.ikon.mn/news/2026/9/9/zzzgfm_white_house_arcade_0_x974.jpg" /> <div class="ikonarsave" style="font-size: 0;line-height: 0;padding-bottom: 66.6015625%;"> </div> </div> <p class="phalf">Цагаан ордон тоглоомын хуудсаа Пүрэв гарагт нээсэн бөгөөд тэр дороо оюуны өмч, арьс өнгөний үзэл зэргийн улмаас шүүмжлүүлж байсан юм.</p> <p>Тухайлбал тоглоомууд болон тэдгээрийн танилцуулга видеонуудад Sega, Microsoft Xbox, Flappy Bird Foundation зэрэг брэндүүдийг санагдуулам дүрслэл олон харагдаж байв.</p> <p>Тоглоомын хуудас танилцуулахдаа Цагаан ордон “Манай засаг захиргаа ерөнхийлөгчийн олон амжилтын түүхийг Америк хүн бүрд таалагдах, шинэлэг байдлаар өгүүлэх арга замуудад анхаарлаа хандуулж байна” хэмээн мэдэгдэж байлаа.</p> <p> </p> <p>Эх сурвалж: <strong>AFP</strong></p> <p> </p>