Украины дайныг зогсоох асуудлаар Трамп, Путин нар утсаар “маш илэн далангүй” ярилцсан гэнэ
<p>Мягмар гарагт АНУ-ын ерөнхийлөгч Дональд Трамп, ОХУ-ын ерөнхийлөгч Владимир Путин нар утсаар Украины дайныг дуусгах асуудлыг “маш илэн далангүй” хэлэлцсэн тухай Кремлийн хэвлэлийн алба мэдээлжээ.</p> <p>Нэг цаг орчим үргэлжилсэн энэ яриа АНУ-ын тусгай элч Стив Виткофф, Жаред Кушнер нар өнгөрсөн амралтын өдрүүдэд Москва, Киев хотуудад айлчилсны дараа болсон байна.</p> <p>Вашингтоны эрх баригчид Орос, Украины ерөнхийлөгч нарыг нүүр тулан уулзуулахыг хичээж байгаа.</p> <p>Элч нарын айлчлалын дараа Украины тал ийм уулзалт энэ сард болох боломжтойг мэдэгдсэн бол Даваа гарагт Кремлийн хэвлэлийн алба уулзалтын товыг зарлахад “эрт байна” гэж мэдэгджээ.</p> <p>Путин, Трамп нар утсаар ярихдаа “Украины асуудлыг шийдвэрлэхэд гол анхаарлаа хандуулсан” гэж Кремлийн зөвлөх Юрий Ушаков сэтгүүлчдэд мэдээлсэн байна.</p> <p>Трамп дайныг хурдан зогсоохыг уриалсан бол Путин фронтын шугамын нөхцөл байдлын “бодитой бөгөөд нарийвчилсан дүн шинжилгээг” танилцуулсан гэж Ушаков хэлжээ.</p> <p>Путин өөрийн цэргүүдийг бүх фронтын шугамаар давшиж байгаа, бүх Донбассыг эзлэх нь цаг хугацааны асуудал болсон гэж байнга хэлдэг.</p> <p>Энэ удаа Путин “дайсагналыг хурдан дуусгахын тулд Америкчууд ямар бодитой зүйл хийж болохыг онцолж”, Орос улс “Европыг түрэмгийлэх төлөвлөгөөгүйг” АНУ-ын ерөнхийлөгчид хэлснийг Ушаков мэдээлжээ.</p> <p>Трамп болон Цагаан ордон Путинтэй утсаар ярьсан талаараа ямар нэг мэдэгдэл гаргаагүй байна.</p> <p>Сүүлийн үед Украины хотуудыг чиглэсэн Оросын агаарын довтолгоо улам эрчимжээд байгаа.</p> <p>Виткофф, Кушнер нарын айлчлалтай холбогдуулан хэрэгжүүлсэн гурван өдрийн гал зогсоох тохиролцоо өндөрлөж, Мягмар гарагийн шөнө Украины нийслэл Оросын агаарын цохилтод өртөхөд таван хүний амь үрэгджээ.</p> <p>“АНУ-ын ерөнхийлөгчийн элч нарыг буцсаны дараа Киевийн эсрэг дахин нэг томоохон, аймшигтай халдлагыг Путин эхлүүллээ. Баллистик пуужингуудын дэлбэрэлт түүний дипломат үг хэллэгээс илүү чанга сонсогдож байна” гэж Украины гадаад хэргийн сайд Андрей Сибига мэдэгджээ.</p> <p>НҮБ-ын баталгаажуулсан статистик тоо баримтаар бол Украин дахь жирийн иргэдийн үхлийн тоо дайны эхний саруудаас хойш өнөөдөр хамгийн өндөр түвшиндээ хүрээд байна.</p> <p> </p> <p>Эх сурвалж: <strong>AFP</strong></p> <p> </p>