របាយការណ៍ PISA ៖ អាស៊ីបន្តឈានមុខគេផ្នែកសិក្សាវិទ្យាសាស្ត្រ គណិតវិទ្យា និងអំណានអត្ថបទ
កម្រិតសិក្សារបស់កូនសិស្សនៃបណ្តាប្រទេសក្នុងតំបន់អាស៊ីនៅតែបន្តឈានមុខគេក្នុងផ្នែកវិទ្យាសាស្ត្រ គណិតវិទ្យា និងអំណានអត្ថបទ។ ចំណែកប្រទេសអឺរ៉ុបជាច្រើនបន្តឋិតក្នុងកម្រិតមធ្យម តែប្រទេសខ្លះទៀតបន្តធ្លាក់ចុះខ្សោយខ្លាំងខាងផ្នែកអំណាន។ នេះបើតាមរបាយការណ៍ថ្មីរបស់ ពីហ្សា (Pisa) ដែលវាយតម្លៃការសិក្សារបស់សិស្សអាយុ ១៥ឆ្នាំ ដែលធ្វើឡើងនៅរៀងរាល់ ៣ ឆ្នាំម្តង។ Pisa ជាគម្រោងយន្តការស៊ើបអង្កេតផ្នែកអប់រំរបស់អង្គការសហប្រតិបត្តិការ និងអភិវឌ្ឍន៍សេដ្ឋកិច្ច ហៅកាត់ជាភាសាបារាំង OCDE។