Франц улстай киноны салбарт хамтарч, 500 сая еврогийн хөрөнгө оруулахаар болсноо Өмнөд Солонгосын ерөнхийлөгч зарлав
<p>Франц улсад айлчилж буй Өмнөд Солонгосын ерөнхийлөгч И Жэ Мён кино урлагийн өсөлтийг дэмжих зорилготой хоёр улсын хамтарсан санаачилгад 500 сая еврогийн ($581 сая) хөрөнгө оруулж буйг Даваа гарагт зарлажээ.</p> <p>Сэн-Поль-де-Вэнс хотод зохион байгуулагдсан Люмьерийн дээд хэмжээний уулзалтын үеэр дэлхийн кино урлагийн салбарт нөлөөлж буй таагүй хүчин зүйлүүдийн талаар ярихдаа тэр үүнийг зарласан байна.</p> <p>Өмнөд Солонгосын санал болгож, Францын дэмжсэн уг санаачилгын хүрээнд хоёр улс ирэх жилээс эхлэн таван жилийн хугацаанд кино урлагийн салбарт тус бүр 500 сая евро зарцуулахаар болжээ.</p> <p>Энэхүү санаачилга нь хоёр улсын хамтарсан төслүүдийг дэмжих, орон нутгийн контент бүтээгчдийг дэлхийн зах зээлд гаргахад туслах зорилготойг И Жэ Мён тайлбарласан байна.</p> <p>Киноны салбарт шинэ сорилт болж буй хүчин зүйлсэд цар тахлын дараах үзэгчдийн сонголтын өөрчлөлт, хиймэл оюун ухааны технологийн хэрэглээ зэргийг тэр дурджээ.</p> <p>“Хэрвээ бид цаг үеийн өөрчлөлтийг зөв авч үзэхгүй бол энэ нь мэдээж хямрал авчрах болно. Гэхдээ урьдчилан сэргийлж чадвал энэ нь тодорхой боломж олгоно” гэж И Жэ Мён хэлээд хямралыг боломж болгохын төлөө ажиллахыг кино урлагийн салбарынханд уриалсан юм.</p> <p>Түүний Францын ерөнхийлөгч Эммануэл Макронтой хамтран даргалсан Люмьерийн дээд хэмжээний чуулганд дэлхийн 30 улсын кино, энтертайнмент салбарын төлөөлөгчид оролцож, салбарынхаа ирээдүйн талаар хэлэлцжээ.</p> <p>Макрон “Өөрчлөлтийг хориглох нь бидний үүрэг биш, бид тэдгээрийг удирдан чиглүүлэх ёстой” гэж хэлсэн байна.</p> <p>Дээд хэмжээний чуулганаас батлагдсан “Люмьерийн Тунхаглал”-д талууд хөдөлгөөнт дүрсний салбарын өсөлтийг дэмжихэд хамран ажиллахаа амлажээ.</p> <p> </p> <p>Эх сурвалж: <strong>Yonhap News</strong></p> <p> </p>