Байлдааны хөлгүүд нь пуужингийн цохилтод өртсөний хариуд АНУ-ын зэвсэгт хүчин Ираны ачааны гурван хөлгийг устгажээ
<p>Бямба гарагт АНУ-ын байлдааны хөлгүүд пуужингийн цохилтод өртсөний хариуд Ираны газрын тос тээвэрлэгч гурван хөлгийг устгаснаа Пентагон өчигдөр мэдээлжээ.</p> <p>Мөн “шаардлагатай бол Ираны газрын тос тээвэрлэгч хөлгийн флотыг бүхэлд нь устгахаа” анхааруулсан байна.</p> <p>Эх сурвалжийн мэдээлснээр Бямба гарагт тэнгист эргүүлийн үүрэг гүйцэтгэж байсан АНУ-ын нисэх онгоц тээвэрлэгч, сөнөөгч хөлгүүд Ираны талаас үйлдсэн олон удаагийн довтолгооноос зайлсхийж чадсан, хүн хүчний ямар нэг хохирол учраагүй гэнэ.</p> <p>Хариу цохилтод Ираны газрын тос тээвэрлэгч хөлгүүдийн хоёр нь “бүрмөсөн ажиллагаагүй болсон” бол ачаагүй хоосон байсан гурав дахь хөлгийг “устгасан” гэж Пентагон мэдээлжээ.</p> <p>Эдгээр нь Исламын Хувьсгалт Гвард болон бүс нутаг дахь зэвсэгт бүлэглэлүүдийг санхүүжүүлэхэд чухал үүрэгтэй Ираны “сүүдрийн флот”-ын нэг хэсэг байсан гэнэ.</p> <p>“Бид Америкийн зэвсэгт хүчнийг хамгаалахад хэзээ ч эргэлзэхгүй бөгөөд хэрвээ шаардлагатай бол Ираны сул дорой, ил задгай байгаа газрын тосны флотыг устгах болно” гэж АНУ-ын цэргийн төв командлалын дарга, адмирал Брэд Купер мэдэгджээ.</p> <p>Бямба гарагийн өглөө Персийн булангийн Харк арлын ойролцоо Ираны газрын тос тээвэрлэгч хөлгүүд цохилтод өртөж, багийн гишүүдийг нүүлгэн шилжүүлсэн тухай Техраны хэвлэлүүд өмнө нь мэдээлсэн юм.</p> <p>Хариуд нь газрын тос тээвэрлэгч гурван хөлөг болон АНУ-ын хөлөг онгоцнууд руу пуужин харвасныг Ням гарагийн орой Ираны төвийн төв телевиз мэдээлжээ.</p> <p>Америкийн тал одоогоор үүнийг батлаагүй байна.</p> <p>Сар гаруй хугацаанд дайны гал намжаад байсан ч бараг долоо хоногийн өмнөөс талууд дахин дайтаж эхэлсэн юм.</p> <p>Мягмар гарагт АНУ-ын агаарын цохилтын улмаас Ираны өмнөд бүсийн нэг хотод хуримын ёслолд оролцож байсан дөрвөн хүн алагдаж, олон арван хүн шархадсан.</p> <p>Пүрэв гарагт ийм зүйл болсон эсэхийг АНУ-ын дэд ерөнхийлөгч Жэй Ди Вэнсээс сэтгүүлч асуухад “заримдаа ийм зүйлс тохиолддог” гэж хариулжээ.</p> <p>Өмнө нь хоёрдугаар сарын 28-ны өдөр буюу дайны эхний өдөр АНУ-ын зэвсэгт хүчин Минаб хотын нэгэн дунд сургуулийг устгахад 156 хүн алагдсаны ихэнх нь сурагч хүүхдүүд байсан юм.</p> <p>Пентагон үүнийг шалгаж үзээд Ираны Хувьсгалт Гвардын тэнгисийн баазыг онилохдоо ойролцоо оршдог сургуулийг буруу координатын улмаас оносон гэх урьдчилсан дүгнэлт гаргаж байв.</p> <p>Энэхүү мөрдлөгийн ажлын бүрэн тайлан одоо болтол олон нийтэд ил болоогүй байна.</p> <p> </p> <p>Эх сурвалж: <strong>Associated Press</strong></p> <p> </p>