តើករណីចាប់ឃុំខ្លួនមនុស្ស ១ឆ្នាំដោយសារគ្មានភស្តុតាងឆ្លុះបញ្ចាំងបែបណាពីនីតិវិធីច្បាប់នៅកម្ពុជា?
នៅថ្ងៃសុក្រទី៤កញ្ញា អ្នកនាំពាក្យក្រសួងយុត្តិធម៌កម្ពុជា បានចេញមកបញ្ជាក់ជុំវិញករណីបណ្តឹងចាប់ និងឃុំខ្លួនមនុស្សច្រឡំថា ជាការអនុវត្តតាមនីតិវិធីត្រឹមត្រូវគ្រប់ដំណាក់កាល។ ការសម្រេចដោះលែងបុរសឈ្មោះ «ស្លេះ វ៉ើត» ឲ្យរួចផុតពីការឃុំខ្លួន គឺដោយសារតែក្រុមប្រឹក្សាជំនុំជម្រះនៃសាលាដំបូងខេត្តស្ទឹងត្រែងវាយតម្លៃថា ពុំមានភស្តុតាងគ្រប់គ្រាន់ដើម្បីចោទប្រកាន់។ ការបញ្ជាក់របស់អ្នកនាំពាក្យក្រសួងយុត្តិធម៌ធ្វើឡើង បន្ទាប់ពីមានពាក្យបណ្តឹងរបស់បុគ្គលឈ្មោះ «ស្លេះ វ៉ើត» ដែលអះអាងថា ខ្លួនបានរងភាពអយុត្តិធម៌ ដោយត្រូវសមត្ថកិច្ចចាប់ឃុំអស់ជិត ១ឆ្នាំ ក្នុងករណីចាប់ច្រឡំមនុស្ស។