Умард Америк, Европыг агшааж, Африкийг томруулсан дэлхийн шинэ газрын зургийг НҮБ дэмжжээ
<p>Баасан гарагт НҮБ-ын ерөнхий ассамблей Африк тивийн хэд хэдэн улсын санаачилгыг дэмжиж, Умард Америк, Европ тивүүдийн хэмжээг агшааж, өөрсдийнх нь тивийг томруулсан дэлхийн шинэ газрын зургийг дэмжих тогтоол гаргажээ.</p> <p>Тивүүдийн газрын зургийг “илүү нарийвчлалтай дүрслэх” зорилготой уг тогтоолыг дэлхийн 164 улс дэмжиж, АНУ ганцаараа эсэргүүцсэн бол өөр зургаан улс санал хураалтад оролцохоос түдгэлзсэн байна.</p> <p>“Equal Earth cartographic projection” нэртэй шинэ газрын зураг нь дэлхийн тивүүдийг илүү бодитой хэмжээгээр дүрсэлдэг гэж үздэг.</p> <p>Одоо өргөн ашиглагддаг уламжлалт газрын зураг нь 1569 онд Флемандын зураг зүйч Жерардус Меркаторын далайн аялалд зориулан зурсан газрын зураг юм.</p> <p>Уг зураг дээр тивүүдийн хэмжээг нэлээд алдаатай дүрсэлж байжээ.</p> <p>Тогтоолын төслийг боловсруулсан Того улсын гадаад хэргийн сайд Роберт Дуссей дэлхийн газрын зураг нь “боловсролыг удирдан чиглүүлж, төсөөллийг бий болгож, ерөнхий ойлголтыг төлөвшүүлдэг” гэж дүгнэсэн байна.</p> <p>“Тиймээс газрын зураг дээр манай тивийг гажуудуулж дүрсэлсэн нь буруу төсөөллийг үе дамжин уламжлуулах эрсдэлтэй” гэж тэр тайлбарлажээ.</p> <p>Харин АНУ-ын төлөөлөгч уг тогтоолыг эсэргүүцэж, ийм шийдвэрүүд нь “энэ байгууллагын нэр хүндийг унагаж буй шалтгаан” гэж НҮБ-ыг шүүмжилсэн байна.</p> <p>“Жинхэнэ асуудлуудад анхаарлаа хандуулахын оронд…энэ байгууллага 16 дугаар зууны үеийн газрын зургаар оролдож, үүний хор хохирол, таних мэдэхүйн шударга ёсны талаар хэлэлцэж байна” гэж АНУ-ын төлөөлөгч Ярина Ференцевич санал хураалтын өмнө мэдэгджээ.</p> <p>Меркаторын зургийн алдаа нь гурван хэмжээст бөмбөрцгийг хоёр хэмжээст хавтгай дээр буулгахад гарсан бэрхшээлээс үүдэлтэй юм.</p> <p>Үүний улмаас бөмбөрцгийн хойд хагасын хэмжээ тэлэгдэж, экватор орчмын хэсэг агшсан байдаг.</p> <p>Хэсэг газрын зураг судлаачдын бүлэг 2018 онд “Equal Earth projection” төслийг эхлүүлж байв. Шинэ зурагт Африк, Латин Америк, Өмнөд Ази, Номхон далайн орнууд илүү том хэмжээтэй харагддаг.</p> <p>Тогтоолыг хамтран санаачилсан Франц улс өчигдөр Меркаторын газрын зургийг цуцалж, шинэ газрын зургийг нэвтрүүлэх болсноо зарласан байна.</p> <p>Меркаторын газрын зурагт “АНУ, ОХУ, Хятад улсууд Африк, Латин Америк, Зүүн Өмнөд Азитай харьцуулахад илүү том харагддаг. Гринланд арал л гэхэд Африктай бараг адилхан том харагдаж байгаа” гэж Францын гадаад хэргийн сайд Жан-Ноэль Барро хэлжээ.</p> <p>“Газрын зураг солих нь дэлхийг өөрчлөхгүй. Гэхдээ гажуудсан дүрслэлийг засах нь үнэнд нийцнэ” гэж тэр хэлсэн байна.</p> <p>Энэ санаачилга нь Франц улс Африк тивтэй, ялангуяа өөрийн колони байсан улс орнуудтай харилцаагаа сайжруулахыг хичээж буйн илрэл болжээ.</p> <p> </p> <p>Эх сурвалж: <strong>AFP</strong></p> <p> </p>