"Аичи-Нагояа 2026" спортын наадмыг гурван телевиз шууд дамжуулна
<p>Японы Айчи муж, Нагояа хотод Азийн зуны спортын 20 дахь наадам энэ сарын 19-нд нээлтээ хийнэ.</p> <p>Тус наадамд шар тивийн Үндэсний Олимпын Хороо (ҮОХ)-ны 45, Азийн наадмын тусгай багаас бүрдсэн нэг нийт 46 багийн 15,000 гаруй тамирчин 43 спортын 71 төрөлд нийт 469 багц медалийн төлөө өрсөлдөх юм. </p> <p>Монгол Улсаа төлөөлж 31 спортын төрөлд 303 тамирчин өрсөлдөхөөр болж, өнгөрсөн долоо хоногт тамирчдад төрийн далбааг гардуулах ёслол болсон билээ.</p> <p>Тэгвэл энэ удаагийн наадамд ажиллах спортын сэтгүүлч, гэрэл зурагчин, зураглаачдад сурвалжлах мандатыг нь гардуулж өглөө. 20 дахь удаагийн Азийн олимпод манай улсаас нийт 50 спортын сэтгүүлч ажиллана. </p> <p>Монголын Үндэсний Олимпын Хороо (МҮОХ)-ны тэргүүн Б.Баттүшиг, МҮОХ-ны ерөнхий нарийн бичгийн дарга Э.Бадар-Ууган нар Азийн наадмыг сурвалжлан ажиллах Монголын спортын сэтгүүлчдийн холбооны гишүүн уран бүтээлч мөн шууд дамжуулалтын телевизүүдэд албан ёсны мандатыг гардуулан өгч амжилт хүсэв.</p> <div class="ikon-block-container">Монголд албан ёсны эрхтэйгээр ”Сүлд”, “NSports”, “Тэнгэр” телевиз энэ сарын 19-нөөс ирэх сарын 4-нийг дуустал эх орон даяар шууд дамжуулан үзүүлэх юм.</div>