Дани улс орчин үеийн түүхэндээ анх удаа Гринланд арал руу цэргийн хүч илгээв
<p>АНУ-ын дарамт шахалтад орсон Дани улс орчин үеийн түүхэндээ анх удаа цэргийн хүчээ Гринланд арал руу илгээсэн нь Умард туйлын бүс нутагт байр сууриа бэхжүүлэх зорилготой алхам болжээ.</p> <p>Ерөнхийлөгч Трамп дэлхийн хамгийн том арлын аюулгүй байдлыг хангаж чадахгүй байгаа Дани улсын эрх баригчдыг байнга шүүмжилж, тус нутгийг АНУ-ын бүрэлдэхүүнд ямар нэг аргаар оруулах санаагаа олон удаа илэрхийлсэн.</p> <p>Тэгвэл өөртөө засах эрхтэйгээр бүрэлдэхүүнд нь оршдог Гринланд арал руу Дани улс эхний ээлжийн цэргүүдээ илгээхэд хугацаат цэргийн алба хаагчид багтсан байна.</p> <p>Зорилго нь стратегийн өндөр ач холбогдолтой тус арал дээр ажиллагаа гүйцэтгэх чадвартай цэргийн хүчийг бий болгох гэнэ.</p> <p>Цэргүүд тус арал дээр зохион байгуулагдах “Arctic Endurance” нэртэй сургуулилалтад оролцож, эрс тэс хүйтэн цаг агаартай нөхцөлд дасан зохицох, байлдааны ажиллагаа явуулах арга техникт суралцах юм байна.</p> <p>Гринландыг олон жилийн турш хайхрахаа больсон байсныг батлан хамгаалахын сайд нь хүлээн зөвшөөрсний дараа Данийн засгийн газар тус арлын аюулгүй байдлыг бэхжүүлэхэд олон тэрбумыг зарцуулахаар болсон юм.</p> <p>Данийн зэвсэгт хүчний энэ ажиллагаа туйлын бүс нутагт НАТО-гийн хэрэгжүүлэхээр санаачилсан “Arctic Sentry” хөтөлбөрийн нэг хэсэг болж байна.</p> <p>НАТО-гийн энэ санаачилгыг Умард туйлын бүс нутагт хамгийн том цэргийн хүч төвлөрүүлдэг Орос улсын эрх баригчид мөргөлдөөн гарах эрсдэлийг нэмэгдүүлсэн алхам хэмээн шүүмжилж байгаа.</p> <p>Хятад улс бас ашигт малтмалын арвин нөөцтэй энэ бүс нутагт үйл ажиллагаагаа эрчимжүүлж буй.</p> <p>Орос, Хятад улсуудын түрэмгийллээс сэргийлэх зорилготой гэж Гринланд арлыг Дани улсаас салгаж авах үндэслэлээ Трамп тайлбарладаг.</p> <p> </p> <p>Эх сурвалж: <strong>Reuters</strong></p> <p> </p>