Нидерланд улс геополитикийн эрсдэлээс сэргийлэхийн тулд АНУ, Канадаас 86 тонн алтаа Лондон руу татав
<p>Нидерландын төв банк Лхагва гарагт АНУ, Канадаас 86 тонн алтны нөөцөө Лондон хот руу шилжүүлжээ.</p> <p>Үүнийгээ тэд “геополитикийн тогтворгүй байдал нэмэгдэж” байгаатай холбоотой авсан арга хэмжээ гэж тайлбарласан байна.</p> <p>“Хямралын үед бид Лондонд байгаа нөөцөө Нью-Йорк, Оттавад байгаагаас илүү хурдан ашиглах боломжтой. Энэ алхмаараа бид алтны нөөцийн хөрвөх чадварыг сайжруулж байна. Бид алтны нөөцөө ашиглах шаардлага хэзээ ч гарахгүй гэж үзэж байгаа ч бэлэн байдлаа бэхжүүлэх шаардлагатай” гэж DNB банкны ерөнхийлөгч Олаф Слейпэн мэдэгджээ.</p> <p>Тус банкны алтны нөөцийн хэмжээ 2025 оны эцэс гэхэд 612.4 тонн болж, 72.2 тэрбум еврогоор үнэлэгдсэн байна.</p> <p>Энэ удаагийн шилжүүлэлтээс өмнө Нидерландын төв банкны алтны нөөцийн 31.3 хувь Нью-Йорк хотод, 19.7 хувь Оттава хотод хадгалагдаж байжээ.</p> <p>Харин шилжүүлгийн дараа хоёр хот тус бүр Нидерландын алтны нөөцийн 18.5 хувийг хадгалдаг болж байна.</p> <p>Харин Лондон хотод ногдох хувь 18.1 хувиас 32.1 хувь болон нэмэгджээ. Нидерландын төв банк нийт нөөцийнхөө 30.8 хувийг өөртөө хадгалдаг юм.</p> <p>Шилжүүлгийг зарах болон авах, биетээр тээвэрлэх гэсэн хоёр аргыг хослуулан гүйцэтгэжээ.</p> <p>Тухайлбал 27 тонн алтыг АНУ, Канадаас нисэх онгоцоор Нидерландын Зейст хотод тээвэрлэн хүргэж, дараа нь Лондон руу шилжүүлсэн байна.</p> <p>Нөөцийн алтны тээвэрлэлт болон зарах/авах ажиллагаа энэ оны гуравдугаар сараас наймдугаар сарын хооронд хэрэгжиж дууссаныг төв банк мэдээлжээ.</p> <p>Cite Gestion Private Bank банкны шинжээч Жон Плассард энэхүү ажиллагааг Нидерландын эрх баригчид хямралын үед алтны нөөцдөө хүрэхэд хялбар, хурдан байх зорилготой гэж дүгнэж байна.</p> <p>Бас дэлхийн бусад төв банкнууд Нидерландын энэ жишгийг дагавал АНУ-д итгэх итгэл алдагдаж болзошгүйг тэр анхааруулжээ.</p> <p>Энэ оны эхээр Германы эрх баригчид бас Нью-Йорк дахь алтны нөөцдөө санаа зовж байгаагаа илэрхийлж байсан. Гэвч Бундесбанк одоохондоо уг нөөцөө хөдөлгөхгүй байх шийдвэр гаргаж байв.</p> <p> </p> <p>Эх сурвалж: <strong>AFP</strong></p> <p> </p>