Depository of News

Францын кино од Жерар Депардье бэлгийн хүчирхийллийн хэрэг үйлдсэнээ хүлээн зөвшөөрч, давж заалдах гомдлоо татлаа

ikon.mn · world

Францын кино урлагийн од Жерар Депардье өөрийг нь бэлгийн хүчирхийллийн хэрэгт буруутгасан шүүхийн шийдвэрийг давж заалдсан гомдлоо буцаан татжээ. Тэрбээр эмэгтэйчүүдэд хандах хандлага нь ихэвчлэн доромж шинжтэй байсныг хүлээн зөвшөөрч, тэднээс "гүн бөгөөд чин сэтгэлийн" уучлалт гуйсан байна. Парисын давж заалдах шатны шүүх хурал эхлэх ёстой байсан өдөр 77 настай жүжигчин ийнхүү гэнэт буруугаа хүлээсэн нь бэлгийн зүй бус үйлдэл гаргаснаа няцааж байсан өмнөх байр сууриа эрс өөрчилсөн хэрэг боллоо. "Шүүхийн шийдвэр гарлаа. Намайг гэм буруутай гэж үзсэн. Би энэ шийдвэрийг ойлгож, хүлээн зөвшөөрч байна... Тиймээс би давж заалдах гомдлоо татан авахаар шийдлээ" гэж тэр мэдэгджээ. Ингэснээр тэр таван жилийн өмнө Парис хотод кино зураг авалтын үеэр хоёр эмэгтэйтэй зүй бус харилцсан хэрэгт хуулийн дагуу гэм буруутайд тооцогдож, түүнд оногдуулсан 18 сарын тэнсэн харгалзах ял хэвээр үлдэж байна. Шүүх хуралд оролцсон хоёр эмэгтэйн нэг болох Амели гэх нэрээр танилцуулагдсан эмэгтэй "Ялалт биднийх боллоо, бид үүнийг толгой дээгүүр хүлээн авч байна" гэж хэлжээ. Хэрэгт холбогдсон нөгөө эмэгтэй (шүүх хурал дээр Сара гэх хуурамч нэрээр тэмдэглэгдсэн) хэлэхдээ "Тэмцэл дууссан тул сэтгэл санаа маш их уужирч байна. Кино урлагийн энэ аварга биетэн уналаа" гэсэн байна. "Кино зураг авалтын талбай дээр би урт удаан хугацааны турш өдөөн хатгалга, бүдүүлэг үг хэллэгээр өөрийгөө халхалдаг байжээ. Хэлсэн үгс, хийсэн зарим үйлдлээ ямар ч ноцтой үр дагаваргүй гэж би боддог байсан. Одоо би бүдүүлэг зан авир болон бусдыг гомдоосон үйлдлүүдэд хил хязгаар байдгийг ойлголоо. Би харилцаж байсан эмэгтэйчүүдээ гомдоохыг хэзээ ч, огтхон ч хүсээгүй. Гэвч хүний ​​мэдэрч буй сэтгэлийн шархад миний санаа зорилго ямар ч хамаагүй гэдгийг би одоо ойлгож байна. Шүүх хурал болсон нь бүгдэд хор хохирол учрууллаа. ​​Бүх зүйл хяналтаас гарсан... үүний дотор миний өмгөөллийн ажил ч багтана. Энэ түүхээс болж олон хүн хохирсон. Цаг хугацааг ухраах боломж надад алга. Би нэгэнт үгүй ​​болсон ертөнцийн хүн байснаа ойлгож авлаа” гэж Депардье мэдэгджээ. Түүний өмгөөллийн ажил "хяналтаас гарсан" гэсэн нь өнгөрсөн оны гуравдугаар сард болсон анхны шүүх хурлын үеэр өмгөөлөгчийнх нь баримталж байсан дээрэнгүй байр суурийг хэлсэн хэрэг байв. Түүний шинэ өмгөөлөгчид болох Дельфин Мейе, Давид-Оливье Камински нар Депардье гэм буруугаа хүлээн зөвшөөрснөөр "амьдралаа цааш тайван үргэлжлүүлэх" хүсэлтэй байгааг дурдаад "78 нас хүрч буй тэрбээр амьдрал гэдэг зүйл шүүх хурал дээр өнгөрүүлэх 10 хоногоос хамаагүй илүү сайхан зүйл болохыг өөртөө хэлж байна" хэмээн нэмж тайлбарлажээ. Анхны шүүх хурлын үеэр Депардьег "Les Volets Verts" киноны зураг авалтын үеэр хоёр эмэгтэйн биеийн эмзэг хэсэгт хүрсэн гэж буруутгасан юм. Сонирхолтой нь уг кино хүч чадал, нөлөө нь буурч байгаатай эвлэрч яваа хөгшин жүжигчний тухай өгүүлдэг. Тухайн үед тэр бүдүүлэг үг хэллэг ашигласнаа хүлээн зөвшөөрсөн ч "нийтийн тээврийн хэрэгсэл дотор эмэгтэйчүүдэд зүй бусаар хүрдэг хүн" шиг аашилсан гэх буруутгалыг няцааж байжээ. Ингэхдээ тэр эмэгтэй хүний ​​өгзөгт хүрэх үйлдлийг "бэлгийн хүчирхийллийн шинжтэй үйлдэл" гэж үздэггүйгээ илэрхийлж байв. "Green Card", "Cyrano de Bergerac" зэрэг кинонуудаар од болсон Депардье бэлгийн хүчирхийллийн хэрэгт холбогдон шүүхийн өмнө анх удаа зогсож байгаа нь энэ юм. Шүүхээс гадуур хэвлэл мэдээллийн хэрэгслүүдээр өөр хэд хэдэн эмэгтэй түүнийг ижил төстэй үйлдэлд буруутгаж байсан удаатай. Түүний үйлдсэн хүчингийн байж болзошгүй хэргийг шүүхээр хэлэлцэх эсэх шийдвэр энэ сард гарах төлөвтэй байна. Эх сурвалж: BBC

Read full article →