លោក ប្រាក់ សុខុន បង្ហាញវឌ្ឍនភាពនៃដំណើរឆ្ពោះទៅកិច្ចប្រជុំកំពូលហ្រ្វង់កូហ្វូនីក្នុងទីក្រុងភ្នំពេញ
រដ្ឋមន្ត្រីការបរទេសកម្ពុជា លោក ប្រាក់ សុខុន បានថ្លែងនៅក្នុងកិច្ចសម្ភាសមួយជាមួយទូរទស្សន៍ជាតិកម្ពុជាថា គិតត្រឹមថ្ងៃទី៩ វិច្ឆិកា មានប្រទេសជាសមាជិកអង្គការហ្រ្វង់កូហ្វូនីចំនួន ៧៩ ក្នុងចំណោមប្រទេសសមាជិកចំនួន ៩០ បានបញ្ជាក់ជាផ្លូវការអំពីការចូលរួមនៅក្នុងកិច្ចប្រជុំកំពូលហ្រ្វង់កូហ្វូនីលើកទី២០ ដែលកម្ពុជាធ្វើជាម្ចាស់ផ្ទះ។ បើតាមលោក ប្រាក់ សុខុន គណៈប្រតិភូចំនួន ៩០០នាក់នឹងមកចូលរួមកិច្ចប្រជុំអន្តរជាតិមួយនេះ ទាំងកម្រិតថ្នាក់រដ្ឋមន្ត្រី និងជំនួបកំពូលហ្វ្រង់កូហ្វូនី។ ប្រមុខការទូតកម្ពុជាបញ្ជាក់បន្ថែមថា ប្រមុខរដ្ឋ និងប្រមុខរដ្ឋាភិបាលចំនួន ២០នាក់ ព្រមទាំងមន្ត្រីក្នុងឋានៈជាឧបនាយករដ្ឋមន្ត្រី និងអនុរដ្ឋមន្ត្រីចំនួន ២៦នាក់ទៀតដែលជាប្រធានគណៈប្រតិភូក៏នឹងមកចូលរួមកិច្ចប្រជុំដ៏មានសារៈសំខាន់នេះដែរ។