Банк дампуурсны дараа Трампын холбоотон, Парагвай улсын ерөнхийлөгч албан тушаалаасаа огцров
Пүрэв гарагт Парагвай улсын ерөнхийлөгч Сантьяго Пенья албан тушаалаасаа огцорлоо. Тус улсын Ueno хэмээх дижитал банк дампуурч, олон сая харилцагч нь данс руугаа нэвтрэх боломжгүй болсны дараа түүнийг огцруулахыг шаардсан дуу хоолой улам эрчимжсэн юм. Пүрэв гарагт хийсэн видео мэдэгдэлдээ Пенья "Би улс орныхоо тогтвортой байдал, нийгмийн амар амгалан байдал, мөн ардчилсан институцуудаа хадгалан авч үлдэх шаардлагыг бодолцон ийм шийдвэр гаргаж байна" гэж хэлжээ. АНУ-ын ерөнхийлөгч Дональд Трампын холбоотон болох тэрбээр сөрөг хүчнийхэн Конгресст өөрийг нь огцруулах (импичмент) ажиллагааг эхлүүлэхээр ээлжит бус хуралдаан зарлаж, жагсагчид түүнийг огцрохыг шаардаж эхэлсний дараа ийнхүү албан тушаалаа хүлээлгэн өгч байна. Пенья бас өөрийн харьяалагддаг консерватив намын гишүүдийнхээ дэмжлэгийг алдсан юм. Түүний албан тушаалыг дэд ерөнхийлөгч Педро Аллиана хүлээн авах төлөвтэй байна. Гэрэл зургийг Reuters агентлагийн онцгой зөвшөөрөлтэйгөөр ашиглав Хууль тогтоогчид Пеньяг ашиг сонирхлын зөрчил үүсгэсэн, тэтгэврийн санг зохисгүй ашигласан, мөн Ueno банкны дампууралтай холбоотой асуудлуудыг байгууллагын түвшинд нуун дарагдуулсан хэмээн буруутгаж байсан юм. Ueno нь санхүүгийн технологийн (fintech) жижиг тоглогчоос хурдацтай өргөжин тэлж, $850 орчим саяын хөрөнгийг захиран зарцуулдаг дунд хэмжээний банк болтлоо томорсон байжээ. Пенья мэдэгдэлдээ "Миний хамгийн том хүсэл бол тухайн хөрөнгийг эргүүлэн олгох баталгааг хангах, хадгаламжийн баталгааны санг зорилгынхоо дагуу ажиллуулах, мөн төсвийн хөрөнгө болон Парагвайн нийт иргэдэд хамаарах нөөц хөрөнгийг хамгаалж үлдэх явдал юм" гэж онцолсон байна. Парагвайн Төв банк Ueno банкийг төлбөрийн чадварын шаардлагыг зөрчсөн гэж үзэн хөндлөнгөөс шалгаж эхэлснээр хямрал эхэлсэн байна. Үүний улмаас 6.5 сая хүн амтай тус улсад Ueno банкны 3 сая орчим харилцагч өөрийн данс руугаа нэвтрэх боломжгүй нөхцөл байдал үүсжээ. Одоогоор тус банкны зүгээс энэ асуудлаар олон нийтэд ямар нэгэн мэдэгдэл хийгээгүй байна. Эх сурвалж: Reuters