Noneudo omakonakono a vakwa
Ounona vondodo o11 itava ka shangulula nande ombapila yotete yoshilongwa shondjokonona (History) nande opu na omapopyo kutya omapulo ekonakono ee livakelwa. Omukulunhu wOmakonakono Opashiwana nOmataloshiivo Clementine Garises okwa koleka oshiningwanima eshi nokwa popya kutya makonakono oshiningwanima eshi aa manifwa. Omapulo ombapila yotete yondjokonona ondodo o11 vati ee lifa naao a shangwa puAuguste 2026 moshitopolwahoololo shErongo. Ouyelele oo wa ongelwa koThe Namibian otau ti ounona vamwe moshitopolwahoololo shaKhomas noZambezi ova endifwa po kovahongifikola vavo kwa longifwa omapulo oo e ke ya mekonakono lopashiwana. Oshiningwanima eshi shokuvaka ekonakono osha kwatela mo ovahongifiko novanambelewa vehongo vakula tava tamanekwa kutya ovayandja omapulo kovapopepi navo.