Хувийн мэдээлэл нь алдагдсаны дараа Өмнөд Солонгосын ерөнхийлөгч, тэргүүн хатагтай нарын паспортыг шинээр сольжээ
Ерөнхийлөгч Ли Жэ Мён болон тэргүүн хатагтай Ким Хэ Гён нарын гадаад паспорт болон бусад хувийн мэдээлэл задарсан тул тэдэнд шинэ паспорт олгохоор болсноо Өмнөд Солонгосын гадаад хэргийн яам Мягмар гарагт мэдэгджээ. Тус улсын засгийн газар болон цагдаагийн байгууллага уг мэдээлэл хэрхэн задарсныг шалгаж байгаа бөгөөд үүнийг гаднын оролцоотой кибер халдлага бус, харин хариуцлага алдсаны улмаас мэдээлэл алдагдсан хэрэг гэж үзэж байна. Гадаад хэргийн яамны хэвлэлийн төлөөлөгч Пак Ду Сүн мэдэгдэлдээ "Гадаад хэргийн яамнаас ерөнхийлөгч, тэргүүн хатагтайг оролцуулаад, мэдээлэл нь задарсан бүх хүнд шинэ паспортыг саадгүй олгох арга хэмжээг шуурхай авч хэрэгжүүлж байна" гэжээ. Зургаадугаар сард ерөнхийлөгч Лигийн Европт хийсэн айлчлалын үеэр түүний тусгай үүргийн онгоцонд зорчсон 168 хүний хувийн дэлгэрэнгүй мэдээллийг саяхан хэн нэг нь кибер аюулгүй байдалтай холбоотой цахим хуудсанд төлбөртэй байршуулсныг илрүүлсний дараа ийм арга хэмжээ авсан байна. Ерөнхийлөгчийн гэр бүлээс гадна өндөр албан тушаалтнууд, тухайлбал, тухайн үеийн бодлогын асуудал хариуцсан тамгын газрын дарга Ким Ён Бом, үндэсний аюулгүй байдлын зөвлөх Ви Сүн Лак, одоогийн ерөнхий сайд Хан Сон Сүк, засгийн газрын хэд хэдэн гишүүн, мөн Хөх ордон болон гадаад хэргийн яамны өндөр албан тушаалтнууд, аюулгүй байдлын ажилтнууд, ерөнхийлөгчийн багт багтан явсан сэтгүүлчид зэрэг хүмүүсийн мэдээлэл үүнд багтжээ. Орон нутгийн хэвлэлүүдийн мэдээлснээр "Зорчигчдын жагсаалт (БНСУ-Бельги)" гэсэн нэртэй, дээрх мэдээллийг агуулсан файлыг зургаадугаар сарын 2-ны өдөр буюу ерөнхийлөгчийг зургаадугаар сарын 9-ний өдөр Европ руу мордохоос өмнө цахим орчинд байршуулсан байсан бөгөөд саяхныг хүртэл хэдэн сарын турш хэн ч хандах боломжтой байсан байна. Задарсан мэдээлэлд тухайн хүмүүсийн солонгос болон англи хэл дээрх нэр, харьяалал, албан тушаал, төрсөн он сар өдөр, паспортын дугаар, паспортын олгосон болон хүчинтэй хугацаа зэрэг мэдээллүүд багтсан байжээ. Гадаад хэргийн яамны хэвлэлийн төлөөлөгч яамныхан мэдээлэл алдагдсаныг яг хэзээ, хэрхэн олж мэдсэн, цагдаагийн байгууллагад хэзээ мэдэгдсэн талаар тодорхой мэдээлэл өгөөгүй бөгөөд зөвхөн холбогдох албаныхан хэрэг явдлын шалтгаан, нөхцөл байдлыг шалгаж байгааг мэдэгдсэн байна. Тухайн цахим хуудас нь хэрэглэгчдийн оруулсан файлд олон төрлийн вирусийн эсрэг программ ашиглан хортой код байгаа эсэхийг шалгаж өгдөг үйлчилгээтэй юм. Яамны мэдээлэл хариуцсан ажилтан уг файлыг хортой код байгаа эсэхийг шалгахаар оруулчхаад тэр чигт нь орхисон байх боломжтой эсэхийг асуухад Пак "Шалгалтын ажил үргэлжилж байна" гэхээс өөрөөр хариулаагүй юм. Алдагдсан мэдээлэлд ерөнхийлөгчийн ойрын хүрээлэлд хамт явдаг гол хүмүүс, тухайлбал хамгаалалтын ажилтнууд, эмнэлгийн ажилтнууд, хүнсний аюулгүй байдлын хянагчид зэрэг хүмүүсийн мэдээлэл багтсан тул энэ хэрэг аюулгүй байдалд сөргөөр нөлөөлж болзошгүй гэсэн болгоомжлолыг төрүүлж байна. Мэдээлэл задарсан нь ил болсны дараа үндэсний цагдаагийн газар мөрдөн шалгах ажлыг эхлүүлсэн бол ерөнхийлөгчийн тамгын газрын дарга Лим Кван Хён яаралтай хурал зарлаж, ерөнхийлөгчийн гадаад айлчлалын аюулгүй байдлын журмыг дахин хянаж үзэхийг холбогдох албаныханд үүрэг болгосон юм. Эх сурвалж: Yonhap News