АНУ-аас орогнох эрх авч, Майамид газардсан Флавио Болсонару өөрийгөө Бразилын хууль ёсны удирдагчаар зарлалаа
Сонгуульд ялагдсаныхаа дараа Лхагва гарагт АНУ-д дүрвэн ирсэн сенатор Флавио Болсонару өөрийгөө Бразилын хууль ёсны удирдагчаар зарлажээ. Тэрбээр Бразилын Дээд Шүүх болон өөрийг нь 4 сая гаруй саналын зөрүүгээр ялсан одоогийн ерөнхийлөгч Луиз Инасио Лула да Силва нарыг сонгуулийн үр дүнгээр дамжуулан төрийн эрхийг булаасан гэж буруутгасан байна. Ням гарагт болсон сонгуульд ялагдал хүлээснийхээ дараа Бразилаас зугтаж, гэр бүлийн хамт Майамид ирсэн Болсонару эх орноосоо гарахад нь тусалж, улс төрийн орогнол олгосон Аргентины ерөнхийлөгч Хавьер Милей болон АНУ-ын ерөнхийлөгч Дональд Трамп нарт талархал илэрхийлжээ. Болсонару сошиал сүлжээнд нийтэлсэн анхны нээлттэй захидалдаа өөрийгөө "сонгогдсон ерөнхийлөгч" хэмээн нэрлэсэн байна. Гэвч тэрбээр дараа нь уг хувилбараа устгаж, оронд нь өөрийгөө Бразилын хууль ёсны "удирдагч" гэж тодорхойлжээ. Тэрбээр шинэчилсэн мэдэгдэлдээ "Зөвхөн надад саналаа өгсөн 60 сая сонгогчдодоо төдийгүй нийт Бразилчуудад хандан хэлэхэд би бол жинхэнэ удирдагч юм. Харин Бразилын сонгуулийг хулгайлсан этгээдүүд бол дарангуйллыг тогтоосон гэмт хэргийн бүлэглэлийн нэг хэсэг юм" гэж мэдэгдсэн байна. Эндрьюсийн агаарын баазад сэтгүүлчид Болсонаругийн мэдэгдлийн талаар асуухад Трамп тодорхой хариулахаас татгалзаж, уг сонгуулийг "маш хачин сонгууль" болсон гэх өмнөх байр сууриа давтсан юм. Болсонаругийн энэхүү мэдэгдэл нь дэлхийн хоёр дахь том газрын ховор элементийн нөөцтэй, Латин Америкийн хамгийн том улс болох Бразилтай харилцаагаа зохицуулахыг хичээж буй Вашингтоны хувьд асуудал үүсгэж болзошгүй байна. Вашингтоны эрх баригчдыг Болсонаругийн гэр бүлтэй хуйвалдаж, тэднийг эрх мэдэлд нь буцаан авчрахыг оролдсон гэж ерөнхийлөгч Лула буруутгаж байгаа. Харин АНУ-ын тал Бразилын дотоод хэрэгт хөндлөнгөөс оролцохыг оролдсон гэх түүний мэдэгдлийг үгүйсгэжээ. Трамп өмнө нь Флавиогийн эцэг, ерөнхийлөгч асан Жаир Болсонаруг шүүхийн хавчлага, мөрдлөгийн хохирогч болсон гэж мэдэгдэж байсан удаатай. Жаир Болсонаро бас 2022 онд Лулад ялагдсанаа хүлээн зөвшөөрөхөөс татгалзаж, АНУ руу явж байв. Тэрбээр хожим Бразилд буцаж ирсэн ч дэмжигчдийнхээ үүсгэсэн үймээн самууны улмаас төрийн эрхийг булаахыг завдсан хэргээр 27 жилийн хорих ял сонссон юм. Өмнө нь авлигын хэргээр хоригдож байсан ч хожим уг ялаа хүчингүй болгуулсан Лула сонгуульд ялсныхаа дараа Болсонаруг өөрийн гэм буруугүйг нотлохын тулд Бразилд үлдэх ёстой байтал гадаад руу дүрвэснийг “ичгүүртэй үйлдэл" хэмээн тодорхойлж байлаа. Болсонару болон түүний гэр бүл Лхагва гарагт Майами хотод газардсан байна. Бразилын Дээд Шүүх түүний гадаад паспортыг хураах шийдвэр гаргасан ч тэр үүнийг биелүүлэхээс татгалзаж, улмаар тус улсаас гарч явжээ. Шүүхийн уг шийдвэр нь мөнгө угаах гэмт хэрэгт холбогдох мөрдөн байцаалттай холбоотой бөгөөд Болсонару өөрийгөө ямар нэг буруу зүйл хийгээгүй гэж үзэж байгаа. Ням гарагт болсон сонгуульд ялах магадлал өндөртэйд тооцогдож байсан ч гэнэтийн ялагдал хүлээсэн Болсонару өрсөлдөгч нь сонгуулийг луйвардсан гэх мэдэгдлээ нотлох баримт гаргаж өгөөгүй байна. Олон улсын ажиглагчид Ням гарагт болсон санал хураалтыг шударга явагдсан гэж дүгнэжээ. Болсонару Лулад ойролцоогоор 4.5 сая саналын зөрүүгээр ялагдсан байна. Тэрбээр мэдэгдэлдээ Бразилаас зугтаагүй, өөрийгөө болон гэр бүлээ шударга бус хэргийн хохирогч болохоос хамгаалах зорилгоор хилийн дээс давснаа тайлбарлажээ. “Бразилаас дүрвээгүй гэдгээ тодорхой хэлмээр байна. Би Бразилаас явсан ч Бразилын ард түмнийг орхиогүй” гэж тэр мэдэгдсэн байна. Эх сурвалж: Reuters