Украины хиймэл дагуулын интернэтийг хязгаарласнаа Илон Маск хүлээн зөвшөөрч, буцаан сэргээв
Бямба гарагт Илон Маск өөрийн SpaceX компани нь Украин дахь Starlink хиймэл дагуулын интернэт үйлчилгээний хурдыг хязгаарласнаа хүлээн зөвшөөрчээ. Энэхүү хязгаарлалт нь Оросын эсрэг өөрийгөө хамгаалах Украины үйл ажиллагаанд саад учруулсан юм. Украины ерөнхийлөгч Володимир Зеленский эхлээд Starlink болон түүнд суурилсан цэргийн зориулалттай Starshield хиймэл дагуулын холбооны хурд өмнөх түвшиндээ хүрснийг мэдэгдсэний дараа Маск сошиал сүлжээгээр дамжуулан ийнхүү хүлээн зөвшөөрсөн байна. Өмнө нь тогтоосон хязгаарлалтын улмаас фронтын шугам дээрх үйл ажиллагаа долоо хоногоос илүү хугацаанд саатаад байсан юм. Украин улс Оросын халдлагыг сөрөн зогсохдоо олон жилийн турш ашиглаж ирсэн хиймэл дагуулын интернэт системийн ажиллагааг хэн тасалдуулах тушаал өгсөн талаар асуудал өнгөрсөн долоо хоногоос хойш яригдаж байв. Зеленский сошиал хуудсандаа "Хурд одоо байх ёстой түвшиндээ хүрсэн" гэж бичээд сэргээх ажил шөнийн турш үргэлжилж, Бямба гарагийн өглөө гэхэд хангалттай түвшинд хүрснийг мэдээлжээ. Ингэснээр фронтын шугамын хангамж, ложистик сайжирч, Оросын Шахед дронуудын эсрэг хамгаалалт бэхэжсэн байна. Украин улс үйлчилгээ хэвийн болсон тухай мэдэгдсэний дараа Илон Маск өнгөрсөн долоо хоногт хэрэгжүүлсэн хурдны хязгаарлалтын талаар тайлбар өгсөн юм. Тэрбээр Бямба гарагт бичихдээ SpaceX компани Starlink үйлчилгээний хурдыг хязгаарласныг хүлээн зөвшөөрсөн байна. Маск "Иргэний зориулалттай, арилжааны үйлчилгээ болох Starlink-ийг хүмүүсийг хөнөөх зорилгоор, довтолгооны дроны цохилтод ашиглахыг хэзээ ч зөвшөөрөөгүй, цаашид ч зөвшөөрөх ёсгүй" гэж мэдэгджээ. "Украины арми Starlink-ийн үйлчилгээний нөхцөлийг зөрчиж, үүнийг хүмүүсийг хөнөөх довтолгооны дроны ажиллагаанд ашигласан. Энэхүү цоорхойг өнгөрсөн долоо хоногт хаасан" гэж тэр цааш нь бичсэн байна Гэхдээ тэр Украины дроны ажиллагаа болон харилцаа холбооны гол тулгуур болсон Starlink-ийн цэргийн зориулалттай хувилбар болох Starshield-д гарсан аливаа өөрчлөлтийг АНУ-ын засгийн газар хянаж байсныг давхар мэдэгджээ. Мөн 2022 оны хоёрдугаар сард Орос улс Украины нутагт довтолж эхэлснээс хойш Украины батлан хамгаалах чадавхыг бэхжүүлэхэд SpaceX компанийн гүйцэтгэсэн үүргийг онцолсон байна. Өнгөрсөн долоо хоногт Starshield-д тогтоосон хязгаарлалт нь Киев, Вашингтон хоёрын хооронд үүссэн хурцадмал байдлыг улам нэмэгдүүлсэн юм. Хоёр талын харилцаа хэдийнээ хурцдаад байсан бөгөөд үүнд АНУ-ын ерөнхийлөгч Дональд Трампын гаргасан Оросоос дизель түлш импортлох шийдвэр нөлөөлсөн. Украины тал үүнийг "урвалт" гэж үзэж байв. Трамп өөрөө Starlink системийг хязгаарлах шийдвэр гаргаснаа үгүйсгэж, үүнийг Илон Масктай холбож байлаа. Харин Маск үүний цаана Пентагон байгааг мэдэгдэж байсан юм. Эх сурвалж: Associated Press