УИХ: Төрийн өмчит компанийн ногдол ашгийн орлогыг төсөвт оруулж тооцох агуулгатай хуулийн төслийг хэлэлцэж байна
УИХ-ын намрын ээлжит чуулганы өнөөдрийн хуралдаанаар Төсвийн тогтвортой байдлын тухай хуульд нэмэлт оруулах тухай хуулийн төслийг хэлэлцэх эсэхийг хэлэлцэж байна. Уг хууль батлагдсанаар төрийн өмчит компанийн ногдол ашгийн орлогыг төсвийн тогтвортой байдлын тусгай шаардлагыг зөрчихгүйгээр төсөвт оруулах боломж үүсэх аж. Хуулийн төсөл санаачлагч ЗГХЭГ-ын дарга Б.Энхбаярын ярьж байгаагаар "Төсвийн хүрээний мэдэгдлийг батлах үед тухайн төсвийн жилийн урьд оны төсвийн үлдэгдлийн эцсийн хэмжээ тодорхой болоогүй байдаг. Гэтэл төсвийн жилийн явцад урьд оны төсвийн үлдэгдэл бодитоор бий болж, түүнийг төсвийн зарцуулалтад ашиглах шаардлага үүсдэг. Иймд төсвийн хүрээний мэдэгдэл батлагдсаны дараа урьд оны төсвийн үлдэгдлийн хэмжээгээр нэмэлт эх үүсвэр бий болсон тохиолдолд уг эх үүсвэрийг төсвийн тогтвортой байдлын тусгай шаардлагыг зөрчихгүйгээр төсөвт тусгах эрх зүйн зохицуулалт шаардлагатай байна. Төрийн болон орон нутгийн өмчит компанийн засаглалын тухай хууль 2027 оноос хэрэгжиж эхлэх бөгөөд уг хуулийн дагуу арилжааны зорилго бүхий төрийн өмчит компани цэвэр ашгийнхаа 30-аас доошгүй хувийг ногдол ашиг хэлбэрээр хуваарилах зохицуулалт хэрэгжинэ. Үүний үр дүнд 2027 онд төсөвт 3,494.7 тэрбум төгрөгийн ногдол ашгийн орлого төвлөрүүлэхээр төлөвлөж байгаа бөгөөд үүнээс 748.8 тэрбум төгрөгийг Хуримтлалын санд, 162.6 тэрбум төгрөгийг орон нутгийн төсөвт, 3,334.7 тэрбум төгрөгийг улсын төсөвт тус тус төвлөрүүлэхээр байна" гэлээ. Тус хуульд дараах нэмэлт өөрчлөлтийг оруулах юм. Тухайлбал “7.9.Дунд хугацааны төсвийн хүрээний мэдэгдэл батлагдсанаас хойш уг мэдэгдлийг боловсруулахад тооцох боломжгүй нөхцөлөөс шалтгаалан ногдол ашгийн орлого, орон нутгийн үнэт цаас, урьд оны үлдэгдлээс хамаарсан эх үүсвэр нэмэгдсэнтэй холбоотойгоор нэгдсэн төсвийн тэнцвэржүүлсэн орлого уг мэдэгдэлд тусгасан доод хэмжээнээс нэмэгдэхээр бол тухайн ногдол ашгийн орлого, эх үүсвэрээс шалтгаалсан нэмэгдлийн хэмжээгээр энэ хуулийн 12.1.4-т заасан нэгдсэн төсвийн нийт зарлагын дээд хэмжээг нэмэгдүүлэн тооцож, болно. Энэ тохиолдолд уг нэмэгдлийн хэмжээнд энэ хуулийн 6 дугаар зүйлд заасан төсвийн тусгай шаардлага хамаарахгүй.” гэж. ВИДЕО: