Гамшгийн үеэр Өмнөд Солонгосын ерөнхийлөгч гольфын талбайд байснаа Трамптай тоглох бэлтгэл байсан гэж тайлбарлажээ
Өнгөрсөн амралтын өдөр Өмнөд Солонгосын зүүн өмнөд бүсийн Тэгү хотод супермаркетын тааз нурсны улмаас 38 хүн бэртсэн осол гарсан байна. Энэ үеэр тус улсын ерөнхийлөгч И Жэ Мён гольф тоглож байсан гэх дуулиан улс төрийн хүрээнд дэгджээ. Тухайлбал сөрөг хүчний Ард Түмний Хүч намын гишүүн Жү Жин Ү осол гамшгийн үеэр ерөнхийлөгч гольф тоглож байсныг илчлэх хэвлэлийн хурал зарласан байна. Харин Хөх ордны захиргаа Ням гарагт үүнээс урьтаж гаргасан мэдэгдэлдээ ерөнхийлөгч гольфын талбайд байсныг хүлээн зөвшөөрсөн ч түүнийг ажлын хариуцлага алдаагүй, байсан газраасаа шууд үүрэг өгч, хариу арга хэмжээ авсныг баталжээ. Тухайлбал Бямба гарагт И Жэ Мён гэр бүлийн хамт Сөүл хотын хойд хэсэгт байрладаг гольфын клубт зочилсон, энэ үеэр Тэгүд болсон ослын талаар мэдээлэл авсныг мэдэгдэлд дурдсан байна. Ерөнхийлөгч энэ үеэр Цагдаагийн Үндэсний Газрын даргын үүрэг гүйцэтгэгч Ким Жон Чолтой утсаар ярьж, хохирлын талаар дэлгэрэнгүй мэдээлэл авсан гэнэ. “Үүний дараа ерөнхийлөгч аврах ажиллагаанд боломжит бүх нөөцийг дайчлах, сэргээн босгох арга хэмжээг шуурхай, аюулгүй хэрэгжүүлэхийг холбогдох байгууллагуудад үүрэг болгосон” гэж Хөх ордон мэдэгдсэн нь гольф тоглох нь ерөнхийлөгч төрийн тэргүүний үүргээ биелүүлэхэд саад болоогүйг батлан харуулах гэсэн ховор тохиолдол болсон байна. Мөн энэ нь И Жэ Мён арванхоёрдугаар сард АНУ-ын Флорида мужийн Майами хотод болох Их 20-ын дээд хэмжээний уулзалтад оролцохдоо гольфын хорхойтон Дональд Трамптай тоглох боломж гарч магадгүй гэсэн үүднээс бэлтгэлээ хангаж буйг харуулжээ. Эрх баригч Ардчилсан Нам ерөнхийлөгчийнхөө үйлдлийг өмгөөлж, сөрөг хүчний Жүгийн мэдэгдлийг “ерөнхийлөгчийн амралт, хувийн цагийн хуваарийг улс төрийн тэмцэлд ашиглах гэсэн оролдлого” хэмээн буруушаасан байна. Тус намын хэвлэлийн төлөөлөгч Чо Гё Вон ерөнхийлөгч И иргэдийн амь насыг хамгаалах үүргээ биелүүлж, нэн даруй арга хэмжээ авсан, гольф тоглосон нь Трамптай хийх тоглолтод бэлтгэх үйл явцын нэг хэсэг байсан гэж мэдэгджээ. Эх сурвалж: Yonhap News