АНУ-ын зэвсэгт хүчний нийт генерал, адмиралуудын тоог 20 хувиар цөөлснийг Пентагоны тэргүүн зарлав
АНУ-ын Батлан хамгаалахын сайд Пит Хэгсэт "хариуцлага тооцох" зорилгоор генерал болон адмиралуудынхаа тоог 20 хувиар цөөлснөө Лхагва гарагт зарлажээ. Тэрбээр энэхүү цомхотголыг "амжилт" хэмээн тодорхойлж, өмнөх засаг захиргааны "woke" (нийгмийн шударга ёс, ижил хүйстний тэгш эрх зэрэг асуудалд хэт анхаардаг либерал үзэл баримтлал) бодлогыг дэмждэг, харин өөрийнх нь санаачилсан дайн тулаанд бэлэн байхад гол анхаарлаа хандуулах санаачилгыг дэмжээгүй офицеруудыг үүнд голчлон хамруулсныг тайлбарлажээ. "Тоо баримтаас харвал бид нийт генерал, адмиралуудынхаа 10 хувийг ажлаас чөлөөлсөн байна. Мөн бид генерал цолтнуудынхаа орон тоог дахин 10 хувиар нэмж цөөлсөн. Тийм ээ, нийт дүнгээрээ 20 хувийн цомхотгол хийсэн” гэж Куантико цэргийн баазад болсон арга хэмжээний үеэр Хэгсэт цэргүүдэд хандан хэлжээ. Тэрбээр цааш нь "Хэвлэл мэдээллийнхэн үүнийг 'цэвэрлэгээ' гэж нэрлэж байна. Харин би үүнийг хариуцлага тооцох үйл явц, бас эртнээс хийгдэх ёстой байсан ажил гэж үзэж байна” гэж мэдэгдсэн юм. Куантико бааз дахь бага тушаалын офицерууд болон энгийн цэргүүдэд хандсан энэхүү үг нь АНУ-ын арми хэт данхар бүтэцтэй, зүүний үзэлтнүүдийн "woke" үзэл санаанд хэт автсан, мөн томоохон өөрчлөлт шинэчлэлт хийх шаардлагатай байгаа тухай дээд тушаалын офицеруудад хандан хэлсэн өмнөх илтгэлээс хойш яг нэг жилийн дараа болж буй үйл явдал юм. Тэрбээр өмнөх илтгэлийг нь “эергээр хүлээж авсан" дээд тушаалын офицерууд одоо "шинэ чиг баримжаатай, эрх мэдэлтэй, сахилга баттайгаар анги нэгтгэлүүдийг удирдаж байгаа" бол харин ингээгүй хүмүүс "энд ажиллахаа больсон" гэж хэлжээ. "Бид одоо 'woke' буюу хэт либерал үзэлтнүүдийн байгууллага, эсвэл сул дорой байгууллага байхаа больсон" гэж Хэгсэт мэдэгдсэн байна. "Үүнийг энгийнээр тайлбарлавал: тарган хүмүүс, трансжендерүүд, сахалтай этгээдүүд, хачин жигтэй хүмүүс, сул доройчууд, хэт туйлшрагчид энд байхгүй. Зөвхөн дайчид – тэсвэр хатуужилтай, бэлэн байдал нь хангагдсан, чин сэтгэлээсээ зүтгэдэг цэргүүд л байна” гэж тэр цааш нь тайлбарлажээ. Хэгсэт 2025 оны тавдугаар сард АНУ-ын зэвсэгт хүчинд томоохон цомхотгол хийхийг үүрэг болгосон бөгөөд үүнд генерал, адмиралуудын нийт тоог 10 хувиар, хамгийн дээд буюу дөрвөн таван хошуутай цолтнуудын тоог 20 хувиар бууруулах асуудал багтаж байв. Тухайн сарын байдлаар АНУ-д идэвхтэй алба хааж буй 831 генерал, адмирал байсан хэдий ч Пентагоны 2026 оны долдугаар сарын сүүлчийн (хамгийн сүүлийн үеийн) мэдээллээр бол дээд тушаалын офицеруудын тоо бодит байдал дээр нэмэгдэж, нийт 851 болсон байжээ. Дээрх 20 хувийн цомхотгол бүрэн хийгдсэн эсэх, эсвэл үргэлжилж байгаа эсэхийг тодруулахад Пентагон: "Бид сайдын өгсөн тайлбараас өөр нэмэлт мэдээлэл өгөх боломжгүй" гэж хариулсан байна. 2025 оны нэгдүгээр сард болсон албан тушаалд томилогдох Конгрессын сонсголын үеэр Хэгсэт хүнд суртал, хэт данхар бүтэц Пентагоныг доройтуулж буйг онцолж, цомхотгол хийх шаардлагатайг мэдэгдэж байв. Тэрбээр тухайн үед хууль тогтоогчдод хандан "Шинээр ажилд авч буй хүмүүс болон засаг захиргааны дотоод бие бүрэлдэхүүнтэй хамтран ажиллаж, илүүдэл зардлыг танаж, тэрхүү хөрөнгийг цэргийн байлдааны чадавхыг нэмэгдүүлэхэд чиглүүлэх нь миний үүрэг байх болно" гэж хэлж байжээ. Өнгөрсөн оны эхээр албан тушаалдаа эргэн ирснээсээ хойш Трамп цэргийн дээд тушаалын албан тушаалтнуудыг цэвэрлэх ажлыг эхлүүлсэн бөгөөд үүнд 2025 оны хоёрдугаар сард ямар ч тайлбаргүйгээр ажлаас нь чөлөөлсөн зэвсэгт хүчний жанжин штабын дарга, генерал Чарльз "CQ" Браун багтаж байв. Мөн чөлөөлөгдсөн бусад өндөр албан тушаалтнуудад АНУ-ын Хуурай замын цэрэг, Тэнгисийн цэрэг, Эргийн хамгаалалтын албаны удирдлагууд, Үндэсний аюулгүй байдлын агентлагийг тэргүүлж байсан генерал, АНУ-ын Агаарын цэргийн хүчний штабын даргын орлогч, НАТО-д томилогдсон Тэнгисийн цэргийн адмирал болон армийн хуулийн гурван өндөр албан тушаалтан багтжээ. Агаарын цэргийн хүчний штабын дарга дөрвөн жилийн бүрэн эрхийн хугацааныхаа дөнгөж хоёр дахь жилдээ ямар ч тайлбаргүйгээр тэтгэвэрт гарах болсноо зарласан бол АНУ-ын өмнөд тойргийн командлалын тэргүүн мөн л албан тушаал хашсанаасаа хойш нэг жилийн дараа тэтгэвэрт гарсан байна. Тухайн үед Хэгсэт “ерөнхийлөгч зүгээр л өөрийн хүссэн удирдагчдаа сонгож байна” гэж тайлбарлаж байсан бол Ардчилсан Намын хууль тогтоогчид улс төрөөс ангид байсаар ирсэн АНУ-ын зэвсэгт хүчний уламжлалыг алдагдуулж буйд санаа зовнилоо илэрхийлж байжээ. Эх сурвалж: AFP