“Миний Монголын Элгэн тараг” бүтээгдэхүүн “Ард түмний хүнс-2027” өргөмжлөлийг хүртлээ
Сүү ХК-ийн “Миний Монголын Элгэн тараг” бүтээгдэхүүн “Намрын ногоон өдрүүд” үзэсгэлэн худалдааны хүрээнд зохион байгуулагдсан “Ард түмний хүнс-2027” шалгаруулалтын сүү, сүүн бүтээгдэхүүний ангилалд шалгарч, “Ард түмний хүнс” өргөмжлөлийг хүртлээ. Энэ жилийн “Ард түмний хүнс-2027” шалгаруулалтад Сүү ХК “Миний Монголын Элгэн тараг” болон “Супер сүү” гэсэн хоёр бүтээгдэхүүнээр оролцжээ. Улмаар “Миний Монголын Элгэн тараг” бүтээгдэхүүн сүү, сүүн бүтээгдэхүүний ангилалд шалгарч, тус өргөмжлөлийн эзэн болсон байна. “Ард түмний хүнс” шалгаруулалт нь үндэсний хүнс, хөдөө аж ахуйн салбарын бүтээгдэхүүнийг олон нийтэд таниулах, дотоодын үйлдвэрлэлийг дэмжих зорилгоор “Намрын ногоон өдрүүд” үзэсгэлэн худалдааны хүрээнд уламжлал болгон зохион байгуулагддаг. Энэ жилийн арга хэмжээ 21 дэх удаагаа зохион байгуулагдсан юм. Уламжлалт хэрэглээнд суурилсан бүтээгдэхүүн: “Миний Монголын Элгэн тараг” нь Сүү ХК-ийн уламжлалт бүтээгдэхүүнүүдийн нэг бөгөөд цэвэр үнээний сүүгээр үйлдвэрлэж, сүүн хүчлийн бактерийн хөрөнгө ашиглан бүрдэг онцлогтой. Бүтээгдэхүүн нь өтгөн, зөөлөн бүтэцтэй бөгөөд өдөр тутмын хэрэглээнд зориулан үйлдвэрлэгддэг байна. Сүү ХК уг бүтээгдэхүүний үйлдвэрлэлийн технологийг 2015 онд дахин нэвтрүүлж, хэрэглэгчдэд хүргэж эхэлжээ. “Миний Монголын Элгэн тараг” нь чихэргүй болон бор элсэн чихэртэй хувилбартай бөгөөд хэрэглээний онцлогт тохирсон өөр өөр савлагаатайгаар худалдаалагддаг. Ийнхүү уламжлалт цагаан идээний хэрэглээтэй холбоотой бүтээгдэхүүнийг орчин үеийн үйлдвэрийн технологиор үйлдвэрлэн зах зээлд нийлүүлж буй бүтээгдэхүүнүүдийн нэг нь “Миний Монголын Элгэн тараг” юм.