ХасБанк ЕСБХБ-тай зээлийн эрсдэл хуваалцах гэрээнд гарын үсэг зурлаа
ХасБанк Европын Сэргээн Босголт Хөгжлийн Банктай (ЕСБХБ) хамтран шинээр олгох ЖДБ-ийн зээлийн эрсдэлийн 50 хүртэлх хувьд баталгаа гаргах, нийт 25 сая еврогийн дүнтэй санхүүгийн эрсдэл хуваалцах хөтөлбөрийг салбартаа анхлан хэрэгжүүлэхээр гэрээнд гарын үсэг зурлаа. Европын Холбооны дэмжлэгтэйгээр хэрэгжиж буй энэхүү шинэ хөтөлбөр нь бичил, жижиг дунд бизнесүүдэд чиглэсэн санхүүжилтийг өргөжүүлэх, бизнес эрхлэгчдэд эргэлтийн хөрөнгийн хэрэгцээгээ ханган, үйл ажиллагаагаа тэлэхэд нь дэмжлэг үзүүлэх зорилготой юм. Мөн хөтөлбөрт хамрагдсан, тодорхой нөхцөл хангасан зээлдэгчид санхүүжилтээс гадна ЕСБХБ-ны "Жижиг дунд бизнесийн зөвлөгөө өгөх үйлчилгээ" (Advice for Small Businesses)-ээр дамжуулан ЕХ-ны санхүүжилттэй техникийн туслалцаа авах боломж бүрдэж байна.